Tesla (Autopilot) පරදන Mustang Mach-E

ඇමෙරිකාවේ Ford Motor Company එක කාලෙකින් කරපු සුවිශේෂී car model එකක් තමයි, 'Mustang Mach-E' crossover SUV එක.

මේකට Mustang කියල නම දැම්ම එක නම් සෑහෙන විවාදයට ලක්වුණා. මොකද බැලු බැල්මට මේ design එකේ "Mustang" ගතියක් නම් නෑ. අනික V8 වෙනුවට battery කෑලි දාන crossover-SUV model එකකට?  

වෙළඳ උපක්‍රමයක් වුණත් නම නිසාම මේ car එක සම්බන්ධව දැන් බොහෝ දෙනා කතා කරනවා.

ලඟදි ඒ කතා බහ වැඩි වුණා, මෙන්න මේ නිසා..,

Tesla Autopilot < Ford Co-Pilot360 (!)

ඔව්, පසුගිය ජූනි 18 වෙනිදා Ford සමගම නිවේදනය කළ විදිහට Tesla Autopilot තාක්ෂණයට වඩා Ford Co-Pilot තාක්ෂණය ඉදිරියෙන් සිටින බවයි කියන්නේ. වෙනතක් තියා මේ අලුත් Mustang එකේ Hands Free Driving Mode එකකුත් තියනවා.

Hands Free Driving, එහෙමත් නැත්නම් Steering Wheel එකේ අත නොතියා යන්න පුළුවන් option එකක් Tesla models වල තවම නෑ. (Mach-E හි ප්‍රධාන තරඟකරුවා වන්නේ Tesla Model Y නිසා බොහෝ විට සැසඳීම් කරන්නේ ඒකත් සමගයි).

Ford සමාගම කියන විදිහට ඔවුන්ගේ testing වලදී ඇමෙරිකානු highway වල සැතපුම් ලක්ෂයකට වඩා මේ Hands Free Mode එකෙන් යන්න Mach-E එකට හැකියාව ලැබිල තියෙනවා.

හැබැයි මෙහෙම යන්න පුළුවන් වෙන්නේ driver කෙලින්ම පාර දෙස බලන් ඉන්නවා නම් පමණයි. ඒ ගැන බලන්න infrared camera එකක් තියෙනවා.

කොහොම නමුත් testing කළ පමණින්, ඒ විදිහටම හැම තැනම, හැම driver කෙනෙක් යටතේම මේක 100% සාර්ථක වෙයි කියල කියන්න කීයටවත් බැරි වේවි. මොකද අවුරුදු 8 කටත් වඩා අත්දැකීම් තියෙන Tesla Autopilot එකත් සමහර තැන වලදී තවම fail වෙනවා.

වෙනත් විශේෂාංග

Intelligent Range - තියෙන battery power එකෙන් යන්න පුළුවන් දුර ගණනය කරන්න Ford company එක AI තාක්ෂණය භාවිතා කරනවා. Driving style එක, කාලගුණය, උෂ්ණත්වය හා වෙනත් Mach-E car වල දත්ත වගේ කරුණු ගණනාවක් මේ සඳහා භාවිතා වෙනවා.

Road Edge Detection - පාර දෙපස සුදු ඉරි නැතත්, පාරේ මායිම හඳුනාගන්න. (පටු ගම්බද පාරවල් වලදී)

Automatic High Beams.

Blind Spot Assist.

මොකක්ද Mach-E විශේෂත්වය?

අපිට Ford කියන්නේ "ලොකු" brand එකක් වුනත් බටහිර රටවල් වලට ඒක එහෙම නෑ. Ford කියන්නේ සාමාන්‍ය ජනතාවගේ වාහනයක්. Escort, Focus, Laser, Mondeo හා ප්‍රසිද්ධ Mustang හා Crown Victoria (US පොලිස්/Taxi එක) වගේ models ඉතාම සරල, අඩු මිල වාහන. බොහෝ විට ඒවාට අමෙරිකාවෙන් පිට brands සමග තාක්ෂණිකව තරඟ කිරීමේ හැකියාවක් නෑ.

ඉතින් Tesla, Audi වගේ "cool" brands වල electric crossover-SUV සමඟ කරට කර තරඟ කරන්න පුළුවන් වාහනයක් Ford හැදුවා කියන එක සුවිශේෂී දෙයක් වෙන්නේ ඒ නිසයි.

Mustang Mach-E 2021 දී නිකුත් වීමට නියමිතයි.